The beforn seyd creatur was mech comfortyd bothe in body and in sowle be this good mannys wordys and gretly strengthyd in hir feyth. And than sche was bodyn be owyr Lord for to gon to an ankres in the same cyté whych hyte Dame Jelyan. And so sche dede and schewyd hir the grace that God put in hir sowle of compunccyon, contricyon, swetnesse and devocyon, compassyon wyth holy meditacyon and hy contemplacyon, and ful many holy spechys and dalyawns that owyr Lord spak to hir sowle, and many wondirful revelacyons whech sche schewyd to the ankres to wetyn yf ther wer any deceyte in hem, for the ankres was expert in swech thyngys and good cownsel cowd gevyn. The ankres, heryng the mervelyows goodnes of owyr Lord, hyly thankyd God wyth al hir hert for hys visitacyon, cownselyng this creatur to be obedyent to the wyl of owyr Lord God and fulfyllyn wyth al hir mygthys whatevyr he put in hir sowle yf it wer not ageyn the worshep of God and profyte of hir evyn cristen, for, yf it wer, than it wer nowt the mevyng of a good spyryte but rathyr of an evyl spyrit. The Holy Gost mevyth nevyr a thing ageyn charité, and, yf he dede, he wer contraryows to hys owyn self, for he is al charité. Also he mevyth a sowle to al chastnesse, for chast levars be clepyd the temple of the Holy Gost, and the Holy Gost makyth a sowle stabyl and stedfast in the rygth feyth and the rygth beleve. And a dubbyl man in sowle is evyr unstabyl and unstedfast in al hys weys. He that is evyrmor dowtyng is lyke to the flood of the see, the whech is mevyd and born abowte wyth the wynd, and that man is not lyche to receyven the gyftys of God. What creatur that hath thes tokenys he muste stedfastlych belevyn that the Holy Gost dwellyth in hys sowle. And mech mor, whan God visyteth a creatur wyth terys of contrisyon, devosyon, er compassyon, he may and owyth to levyn that the Holy Gost is in hys sowle. Seynt Powyl seyth that the Holy Gost askyth for us wyth mornynggys and wepyngys unspekable, that is to seyn, he makyth us to askyn and preyn wyth mornynggys and wepyngys so plentyuowsly that the terys may not be nowmeryd. Ther may non evyl spyrit gevyn thes tokenys, for Jerom seyth that terys turmentyn mor the devylle than don the peynes of helle. God and the devyl ben evyrmor contraryows, and thei schal nevyr dwellyn togedyr in on place, and the devyl hath no powyr in a mannys sowle. Holy Wryt seyth that the sowle of a rytful man is the sete of God, and so I trust, syster, that ye ben. I prey God grawnt yow perseverawns. Settyth al yowr trust in God and feryth not the langage of the world, for the mor despyte, schame, and repref that ye have in the world the mor is yowr meryte in the sygth of God. Pacyens is necessary unto yow for in that schal ye kepyn yowr sowle." Mych was the holy dalyawns that the ankres and this creatur haddyn be comownyng in the lofe of owyr Lord Jhesu Crist many days that thei were togedyr.